fim.az

Şəhid adından alver etmək günahdı

5-04-2019, 15:17

Şəhid adından alver etmək günahdı














Bir sıra saytlarda guya Masallı rayonunda aprel şəhidinin ailəsinə qarşı haqsızlıq edilməsi ilə bağlı məlumat yayılıb. Aprel döyüşlərinin ildönümü ərəfəsində - ordumuzun bu rəşadətli zəfəri qeyd edildiyi, Aprel şəhidlərinin ailələrinə böyük diqqət və qayğının göstərildiyi bir vaxtda, bəzi saytlarda belə bir məlumatın yayılması təəccüb doğurdu.
Yayılan məlumatın “çiy” olduğu, qeyri-peşəkar hazırlandığı diqqəti dərhal cəlb edir. Hiss olunur ki, hansısa qüvvələr Aprel döyüşlərinin ildönümü ərəfəsində qarışıqlıq yaratmağa, şəhid ailələrinə göstərilən diqqət və qayğıya kölgə salmağa cəhd göstərirlər. Məsələ ilə bağlı araşdırma apardıq. Məlum oldu ki, Aprel döyüşlərində Masallının iki oğlu şəhid olub. Güllütəpə kəndindən Firdovsi Bağırzadə və Viləş kəndindən Nurlan Əsgərli.
Hər iki şəhidin dəfn xərcləri bütünlüklə Masallı rayon İcra Hakimiyyəti tərəfindən qarşılanıb. Şəhidlərin ailələri daim diqqət mərkəzində saxlanılıb. Hər il Aprel döyüşlərinin ildönümü ərəfəsində şəhidlərin məzarı ziyarət edilib, oxuduqları məktəbdə tədbir keçirilib, xatirələri anılıb. Hər iki kəndin mərkəzi küçələrinə şəhidlərin adı verilib, xatirə lövhəsi vurulub. Şəhidlərin ailələri də daim diqqətlə əhatə olunublar. Firdovsi Bağırzadənin anası və bacısı yarasız evdə yaşadıqları üçün, icra hakimiyyətinin təşəbbüsü, xeyriyyəçi insanların maliyyə dəstəyi ilə ailəyə ev tikilib. Bağırzadənin nişanlı olan bacısının toy xərcləri də rayon rəhbərliyi tərəfindən qarşılanıb.
Elə Viləş kəndinin şəhidi Nurlan Əsgərlinin də qardaşının - “narazılıq” edən Ziba Əsgərovanın digər oğlunun ötən il keçirilən toy mərasimində rayon rəhbərliyi kollektiv surətdə iştirak edib. Üstəlik, Ziba xanımın xahişi nəzərə alınaraq, Viləş kəndinin tut bağı heç bir vergi ödənilməmək şərti ilə ona icarəyə verilib.
Ancaq hansısa qüvvələr Firdovsi Bağırzadənin ailəsinə ev tikilməsini önə çəkərək, Nurlan Əsgərlinin də anasını “icra hakimiyyətinə de, qoy Bakıda sənə ev alsınlar” tələbi ilə danışdırmaq, həm şəhid adından alverin göstəricisi, həm də ölkə rəhbərliyinin şəhid ailələrinə göstərdiyi diqqət və qayğıya kölgə salmağın təzahürüdür.
Şəhid anasını öz təxribatların alət etmək, onu öyrədərək icra hakimiyyətinin səlahiyyətləri daxilində olmayan tələblər irəli sürməyə vadar etmək, bir rayon rəhbərliyinə yox, ölkə rəhbərliyinin gördüyü işlərə qarşı aparılan kampaniya hesab olunmalıdır.
Bu təxribatı həyata keçirənlər o qədər bəsit böhtana əl atıblar ki... Nəticədə özlərini gülünc yerinə qoyublar.
Məsələn, şəhid anasının adından yazırlar ki, guya şəhidin ildönümü mərasimində Rayon İcra Hakimiyyəti Damlanın konsertini təşkil edib və konsertin də səsi kəndə gəlib.
Azərbaycanda Aprel döyüşlərinin ildönümü matəm günü kimi yox, zəfər günü kimi qeyd olunur. Viləş kəndi ilə Masallı rayonunun mərkəzi arasında isə 10 km məsafə var. Bu məsafədən “konsert səsini eşidənlər”, şəhid anasının adından istifadə edənlər hansı təxribata yol verdiklərinin fərqindədirlər? Üstəlik, Masallı rayon İcra Hakimiyyətinin təşəbbüsü ilə rayonda heç bir konsert təşkil olunmayıb. Yalnız Yeni Azərbaycan Partiyasının təşəbbüsü ilə 2018-ci ilin aprelin 5-də rayonda prezident seçkiləri ilə bağlı konsert təşkil edilib ki, belə tədbirlər də bütün ölkə boyu keçirilib.

Bəzi qüvvələr tərəfindən belə bir təxribatın məhz Aprel döyüşləri ərəfəsində yayılması haqlı sual doğurur: Deməli, kimlərsə Aprel döyüşlərində qazanılan zəfəri qəbul etmirlər. Deməli, kimlərsə ölkə rəhbərliyin şəhidlərimizin ailə üzvlərinə, döyüşlərdə yaralanan qazilərə, ümumiyyətlə, Qarabağ müharibəsi veteranlarına göstərdiyi diqqət və qayğını həzm edə bilmirlər. Amma təəssüf doğuran məqam həm də odur ki, bir sıra saytlar da bilərəkdən və ya bilməyərəkdən bu təxribata dəstəkçi olurlar. Şəhid adından alver etmək günah sayılsın gərək. Şəhid adına hörmət edək, onu alver predmetinə çevirməyək. İcazə verməyək ki, ordumuzun qüdrətlənməsini, dövlətimizin möhkəmlənməsini həzm etməyən təxribatçı qüvvələr vətənimizdə sabitliyi pozmağa, qarışıqlıq yaratmağa cəhd göstərsinlər.
Şəhid adından alver etməyək, günaha batmayaq!

Xeberleragentliyi.com


Mətndə səhv var? Onu siçanla seçin və Ctrl+Enter düyməsini basın. Oxunub: 288}
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR
www.FIM.az
Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.
Təsisçi: Elçin Mahmudov
Tel:055 252 72 22