Rusiya-Ukrayna müharibəsinin dördüncü ildönümündə Böyük Britaniya Rusiyaya qarşı ən böyük sanksiya paketini elan edib və bu paketə təxminən 300 yeni təklif daxil edilib.
Bu barədə Böyük Britaniya Xarici İşlər Nazirliyi məlumat yayıb.
Bəyanatda qeyd olunub ki, Böyük Britaniya Kremlin həyati əhəmiyyətli neft gəlirlərini kəsməklə qanunsuz müharibə aparmaq qabiliyyətini daha da zəiflədəcək tarixi sanksiyalar paketini təqdim edib.
Bəyanatda o da bildirilib ki, bu sanksiya paketi Rusiyanın 2022-ci ildə Ukraynaya müdaxiləsindən bəri ən böyük sanksiya paketidir və əlavə olunur: "Bugünkü tədbir dünyanın ən böyük neft boru kəməri şirkətlərindən biri olan və Rusiyanın neft ixracının 80 faizindən çoxunu həyata keçirən PJSC “Transneft”i hədəf alır və Kremlin sanksiyalı nefti üçün alıcı tapmaq səylərini daha da çətinləşdirir.
Bəyanatda sanksiyaların həmçinin Rusiyanın qanunsuz neft ixracının qarşısını almağı hədəfləyən "kölgə donanması" kimi tanınan neft tankerlərini də hədəf aldığı əksini tapıb: "Yeni tədbirlər Rusiyanın ən böyük qlobal kölgə donanması operatorlarından biri və Rusiya xam neftinin əsas ticarətçisi olan "2Rivers" neft şəbəkəsindəki 175 şirkətə sanksiya tətbiq edilib".
Bəyanatda Rusiyanın bu günə qədər tətbiq edilən beynəlxalq sanksiyalardan 450 milyard dollardan çox itkiyə məruz qaldığı bildirilir və bu itkinin Rusiyanın Ukraynadakı müharibəsi üçün iki illik əlavə maliyyələşdirməyə çevrildiyi bildirilir.
Rusiyanın kölgə donanmasının Britaniya hökuməti üçün əsas hədəf olduğu qeyd edilən bəyanatda, eyni zamanda Böyük Britaniyanın indiyə qədər Rusiya ilə əlaqəli 3000-dən çox şəxsə, təşkilata və neft tankerinə sanksiyalar tətbiq etdiyi bildirilir.
Böyük Britaniyanın bu gün açıqladığı sanksiyalar paketinə 49 silah istehsalçısı və fərdi şəxs, 3 mülki nüvə enerjisi şirkəti, mayeləşdirilmiş təbii qaz ixracından məsul olan Portovaya və Vısotsk terminalları da daxil olmaqla 6 obyekt və 9 Rusiya bankı daxildir.
Qeyd edək ki, Avropa Komissiyasının prezidenti Ursula fon der Leyen də Rusiyaya qarşı maksimum təzyiqin davam etməsinə toxunaraq deyib ki, tezliklə 20-ci sanksiya paketini qəbul edəcəyik: “Sanksiyalarımız Rusiyanın gəlirlərini azaltmağa və müharibə maşınını zəiflətməyə davam edəcək".
