ABŞ və İsrailin "Epic Fury" (Epik Qəzəb) əməliyyatı ikinci həftəsinə qədəm qoyarkən, Vaşinqtondan Tehrana ən sərt hədə gəlib.
Ağ Ev İranın qeyd-şərtsiz təslim olması tələbini irəli sürərək, hərbi hədəflərə çatana qədər zərbələrin dayanmayacağını, eyni zamanda quru əməliyyatı ehtimalının hələ də masada qaldığını bəyan edib.
ABŞ Prezidenti Donald Tramp hərbi rəhbərliyə tapşırıq verərək bildirib ki, İran rəhbərliyi tam kapitulyasiya vəziyyətinə gələnə qədər əməliyyatlar davam edəcək. Ağ Evin mətbuat katibi Karoline Leavitt vurğulayıb ki, müharibənin taleyi Ali Baş Komandanın hərbi məqsədlərin yerinə yetirildiyinə dair qərarından asılıdır və bu nöqtədə İranın rəsmi olaraq nə deməsindən asılı olmayaraq, ölkə faktiki təslim olmuş sayılacaq. Qlobal bazarları lərzəyə salan neft və qaz qiymətlərindəki artımdan danışan Vaşinqton rəsmiləri, bu bahalaşmanın müvəqqəti xarakter daşıdığını və cari əməliyyatların uzunmüddətli perspektivdə enerji qiymətlərinin kəskin şəkildə ucuzlaşmasına gətirib çıxaracağını iddia edirlər. Administrasiya hesab edir ki, İranın neft infrastrukturu üzərində nəzarətin təmin edilməsi və bölgədəki hərbi təhdidlərin aradan qaldırılması gələcəkdə qlobal bazarlarda sabitliyi bərpa edəcək. Bununla belə, hərbi ekspertlər quru əməliyyatının başlanacağı təqdirdə münaqişənin daha genişmiqyaslı regional müharibəyə çevrilə biləcəyi barədə xəbərdarlıqlarını davam etdirirlər.
Hazırda ABŞ kəşfiyyatı İranın strateji obyektlərini hədəf almağa davam edir və Tramp administrasiyası müharibədən sonrakı İran üçün "qəbul edilə bilən" yeni liderlərin seçilməsi prosesində birbaşa iştirak edəcəyini açıq şəkildə bəyan edib.
