İran Hərbi Dəniz Qüvvələri ABŞ-ın BƏƏ-dəki Əd-Dəfra və Bəhreyndə Şeyx İsa hava bazalarına zərbələr endirib.
Tasnim xəbər verir ki, bu barədə İslam İnqilabı Keşikçiləri Korpusu (İİKK) məlumat verib.
Bildirilir ki, hücum zamanı Amerika təyyarələrinin yerləşdiyi anqarlar məhv edilib.
Bəyanatda deyilir: "İİKK Hərbi Dəniz Qüvvələri birləşmiş raket və pilotsuz təyyarə əməliyyatı zamanı hava bazalarındakı bir neçə Amerika döyüş təyyarəsi anqarını yüksək partlayıcılı qanadlı raketlərlə məhv edib".
İİKK Amerika qüvvələri regiondan tamamilə çıxarılana qədər Yaxın Şərqdəki ABŞ bazalarına zərbələri davam etdirəcəyinə söz verib.
Ağ Evin sözçüsü Kerolin Levit bildirib ki, ABŞ İranda hərbi əməliyyatın başlanğıcından bəri artıq 7000-dən çox hədəfi vurub.
O, çıxışında 100-dən çox İran gəmisinin batırıldığını da qeyd edib.
Bu arada, İslam İnqilabı Keşikçiləri Korpusu (İİKK) münaqişədə artıq 680-dən çox Amerika və İsrail hərbçisinin öldüyünü və ya yaralandığını iddia edib.
