Azərbaycan XX əsrin sonunda müstəqilliyini bərpa etsə də, müstəqilliyin ilk illərində çox məşəqqətli vəziyyətlə üz-üzə qaldı. Azərbaycan yenidən nəinki müstəqilliyini itirmək, hətta siyasi xəritədən silinmək təhlükəsi ilə qarşılaşdı. Lakin 1993-cü ildə xalqın təkidli tələbi ilə yenidən hakimiyyətə gələn Ulu Öndər Heydər Əliyev ölkəni bu bəlalardan xilas edərək müstəqilliyin dönməzliyini təmin etdi və davamlı inkişafın əsasını qoydu.
Azərbaycanın inkişafını görüb buna qarşı çıxan xarici güclər və ölkələr daxildəki əlaltıları vasitəsilə ölkəni daxildən dağıtmaq üçün dəfələrlə cəhdlər göstərdilər. Ancaq Ulu Öndər Heydər Əliyevin cəsarətli, qətiyyətli və uzaqgörən siyasəti nəticəsində bütün bu cəhdlərin qarşısı alındı.
Ulu Öndər Heydər Əliyevin siyasi irsinin layiqli davamçısı Prezident İlham Əliyevin hakimiyyəti dövrü isə Azərbaycanın qələbələr, zəfərlər və uğurlar dövrü kimi xarakterizə olunur. Lakin yenə də xarici qüvvələrin dəstəyi ilə daxildə ölkənin inkişafını dayandırmaq, xaos yaratmaq və dövlətçiliyə xəyanət etməyə hazır olan qüvvələr tapıldı. Onlardan biri də müxtəlif cildlərə girərək hakimiyyətdə yüksək mövqe tutan Ramiz Mehdiyev idi.
Ramiz Mehdiyev Azərbaycan dövlətçiliyinə qarşı xəyanət yolunu seçdi. O, öz siyasi buqələmunluğu ilə ölkəni yenidən Rusiyanın təsir dairəsinə salmaq niyyətində idi. İmperiya psixologiyasının daşıyıcısı olan Mehdiyev bu çirkin planını reallaşdırmaq üçün müxtəlif taktikalara əl atırdı.
Ramiz Mehdiyevin xəyanət dosyesinə nəzər salsaq görərik ki, o, hakimiyyətdəki mövqeyindən sui-istifadə etməklə həm məmurlardan, həm də müxalif siyasi qüvvələrdən və hərbçilərdən ibarət “5-ci kolon” şəbəkəsi formalaşdırmağa başlamışdı.
Birincisi, Mehdiyev məmurları aldatmaqla öz tərəfinə çəkə bilməyəndə, intriqa qabiliyyətindən istifadə edərək onların işdən çıxarılmasına və ya zərərsizləşdirilməsinə çalışırdı.
İkincisi, radikal müxalifəti dəstəkləyib onlara əlaltından yardım etməklə ölkədə ictimai-siyasi sabitliyi pozmağa, xaos yaratmağa və bununla da öz çirkin niyyətlərini həyata keçirməyə cəhd edirdi.
2003-cü il 15 oktyabr prezident seçkilərinin ilkin nəticələrindən sonra radikal müxalifətin küçələrə çıxmasının əsas səbəbkarı da məhz Ramiz Mehdiyev və onun ətrafı idi. Mehdiyevin məqsədi ölkədə xaos yaratmaq idi. Plan baş tutmadıqda isə aksiya iştirakçılarına qarşı sərt tədbirlərlə Azərbaycanın demokratik imicinə və hakimiyyətin nüfuzuna zərbə vurmağa çalışdı. Bu yolla o, hakimiyyət üçün “lazımlı şəxs” olduğunu sübuta yetirmək istəyirdi.
Sonrakı illərdə Prezident İlham Əliyevin liderliyi ilə Azərbaycanın qazandığı uğurlar Ramiz Mehdiyev tərəfindən qısqanclıqla qarşılandı. Radikal müxalifətin ölkə daxilində təsirini itirdiyini görən Mehdiyev bu dəfə xaricdə “söyüş müxalifəti” adlanan qrupun formalaşmasına dəstək verdi. Onların “ağızlarından fəaliyyəti” göz qabağındadır. Lakin bu da nəticə vermədi, çünki xalq kimin kim olduğunu yaxşı bilirdi və belə təxribatlara uymadı. Əksinə, Prezident İlham Əliyevin ətrafında daha sıx birləşərək düşmənlərin niyyətlərini puça çıxardı.
Nəticədə, kölə psixologiyasına sadiq Ramiz Mehdiyevin xəyanəti üzə çıxdı. O, 2019-cu ildə vəzifəsindən uzaqlaşdırıldı. AMEA-da rəhbər olan zaman da dinc durmadı. Ramiz Mehdiyev yenə də öz çirkin əməllərindən əl çəkmədi. “5-ci kolon”un dəstəyindən istifadə etməklə Azərbaycan dövlətçiliyini zəiflətməyə davam etdi.
2022-ci ildən AMEA-dan uzaqlaşdırılan Mehdiyev Moskvadakı himayədarlarına sadiqliyini sübut etmək üçün ölkəmizə qarşı fəaliyyətini gizli şəkildə davam etdirdi.
Nəticə isə bəllidir: Səbail Rayon Məhkəməsi onun barəsində 4 aylıq ev dustaqlığı qətimkan tədbiri seçib. Ramiz Mehdiyevə qarşı Cinayət Məcəlləsinin 278-ci (hakimiyyəti zorla ələ keçirmə və ya zorla saxlama), 274-cü (dövlətə xəyanət) və 193-cü (cinayət yolu ilə əldə edilmiş əmlakı leqallaşdırma) maddələri ilə cinayət işi açılıb. Bu isə hələ son deyil. Ömrünü xəyanətə sərf edən Mehdiyevin əməlləri cavabsız qalmayacaq.
İstintaq onun Azərbaycan dövlətçiliyinə və bu siyasəti yürüdən Prezidentə qarşı hərəkətlərini tam araşdıracaq və Mehdiyev layiqli cəzasını alacaq.
