Fransa və Böyük Britaniya Hörmüz boğazını açmaq üçün 30 ölkədən ibarət koalisiya yaradır.
Bunu Britaniya Müdafiə Nazirliyinin sözçüsü məlumat verib.
Britaniya Müdafiə Nazirliyinin sözçüsü AFP-yə bildirib ki, London və Paris bu həftə Hörmüz boğazının yenidən açılması üçün koalisiya yaratmaq məqsədilə 30 ölkənin hərbi nümayəndələri ilə danışıqlar aparacaq.
Ötən həftə Ağ Evin təzyiqi altında Böyük Britaniya, Fransa, Almaniya, İtaliya, Yaponiya və Hollandiya "Hörmüz boğazından təhlükəsiz keçidi təmin etmək səylərinə töhfə verməyə" hazır olduqlarını açıqlayıblar. Bu bəyanat daha sonra daha 24 ölkə tərəfindən dəstəklənib. Britaniya rəsmisi bildirib ki, bu həftə hərbi departamentlər arasında daha bir görüş gözlənilir və bu görüşdə artıq ilkin razılaşmanı imzalayan genişləndirilmiş qrupun müdafiə qərargah rəisləri iştirak edəcək.
"The Times"in məlumatına görə, bazar günü Britaniya Silahlı Qüvvələrinin Müdafiə Qərargahının rəisi Riçard Nayton sazişin birinci mərhələsində iştirak edən altı ölkənin və Kanadanın iclasına sədrlik edib.
30 ölkənin iştirak etdiyi geniş iclasda, 28 fevralda İrana qarşı müharibə başlamazdan əvvəl dünya neft tədarükünün 20%-i və mayeləşdirilmiş təbii qaz yüklərinin 30%-ə qədərinin keçdiyi boğazda İran qüvvələri tərəfindən yerləşdirildiyi güman edilən minaların necə təmizlənəcəyi müzakirə olunacaq.
İran bildirib ki, "düşmən olmayan" ölkələrdən olan gəmilər təhlükəsizlik qaydalarına əməl etdikləri təqdirdə Hörmüz boğazından keçə bilərlər.
