27 fevral 2026-cı il tarixində Xətai Rayon İcra Hakimiyyətinin təşkilatçılığı ilə “Hicaz” mərasim evində müqəddəs Ramazan ayı münasibətilə iftar məclisi təşkil edilib.
Fim.az xəbər verir ki, tədbirdə rayon İcra Hakimiyyətinin başçısı Rafiq Quluyev, Milli Məclisin deputatları Vüqar Rəhimzadə və Pərvanə Vəliyeva, YAP Xətai rayon təşkilatının sədri Ramil Mirzəyev, rayon hüquq-mühafizə orqanlarının rəhbərləri, şəhid ailələrinin üzvləri, qazilər və ictimaiyyət nümayəndələri iştirak ediblər.
Məclis Qurani-Kərimdən ayələrin tilavəti ilə başlayıb, dualar oxunub, Vətənimizin tərəqqisi, xalqımızın rifahı və ölkəmizin sabitliyi üçün diləklər səsləndirilib. Çıxış edənlər ümummilli lider Heydər Əliyevin əziz xatirəsini dərin ehtiramla yad edib, Vətən uğrunda canlarını fəda etmiş şəhidlərimizin ruhuna rəhmət diləyiblər.
Bildirilib ki, Ulu Öndərin müəyyənləşdirdiyi siyasi xətt bu gün Azərbaycan Respublikasının Prezidenti İlham Əliyev tərəfindən uğurla davam etdirilir. Eyni zamanda, Birinci vitse-prezident, Heydər Əliyev Fondunun prezidenti Mehriban Əliyevanın həyata keçirdiyi layihələr ölkəmizdə sosial həmrəyliyin möhkəmlənməsinə, milli-mənəvi dəyərlərin qorunmasına və dini-mədəni irsin yaşadılmasına mühüm töhfələr verir. Azərbaycanın tolerantlıq və multikulturalizm ənənələrinin beynəlxalq miqyasda yüksək qiymətləndirildiyi xüsusi vurğulanıb.
İftar süfrəsi arxasında Ramazan ayının mənəvi əhəmiyyəti, insanları xeyirxahlığa, mərhəmətə və paylaşmağa səsləyən dəyərləri barədə söhbətlər aparılıb. Sonda ölkəmizə davamlı sülh, əmin-amanlıq və firavan gələcək arzulanıb.
